கிறிஸ்துமஸ் களத்தில் விஷால், சசிகுமார் படங்கள்!

சுராஜ் இயக்கத்தில் விஷால் நடித்துள்ள ‘கத்திசண்டை’ முதலில் இம்மாதம் ரிலீசாகவிருந்தது. ஆனால் சூர்யாவின் ‘சிங்கம்-3’, ஜெயம் ரவி, அரவிந்த்சாமி இணைந்து நடித்துள்ள ‘போகன்’ உட்பட வேறு சில படங்களும் இம்மாத ரிலீஸ் ப்ளானில் இருந்து வந்ததால் ’கத்திசண்டை’யின் ரிலீஸை பொங்கலுக்கு தள்ளி வைத்தார்கள். ஆனால் இப்போது சூர்யாவின் ‘சிங்கம்-3’, ஜெயம் ரவி, அரவிந்த் சாமியின் ‘போகன்’ ஆகிய இரண்டு படங்களும் இம்மாத ரிலீஸ் ப்ளானிலிருந்து பின் வாங்கியிருப்பதால் ‘கத்திசண்டை’யை இம்மாதமே ரிலீஸ் செய்து விட முடிவு செய்திருக்கிறார்கள். அதாவது கிறிஸ்துமஸ் பண்டிகையையொட்டி ‘கத்திசண்டை’யை 23-ஆம் தேதி ரிலீஸ் செய்ய முடிவு செய்திருக்கிறார்கள். கிறிஸ்துமஸை முன்னிட்டு சசிகுமார் நடிப்பில் உருவாகியுள்ள ‘பலே வெள்ளையத் தேவா’ திரைப்படமும் வெளியாகவிருக்கிறது. இதனால் விஷால் மற்றும் சசிகுமார் நடித்த படங்கள் ஒரே நாளில் வெளியாகி நேருக்கு நேர் மோதும் சூழ்நிலை உருவாகியுள்ளது.