‘‘சினிமா என் அம்மா, அவள் என்னை கைவிட மாட்டாள்’’ – சிவகுமார் நெகிழ்ச்சி!

‘‘சினிமா என் அம்மா, அவள் என்னை கைவிட மாட்டாள்’’ – சிவகுமார் நெகிழ்ச்சி!

கட்டுரை 27-Oct-2016 10:54 PM IST VRC கருத்துக்கள்

நடிகர் சிவகுமார் தனது 75-ஆவது பிறந்த நாளை நேற்று (27-10-16) பத்திரிகையாளர்களுடன் கொண்டாடினார். இவ்விழாவில் நடிகர்கள் சூர்யா, கார்த்தி மற்றும் பலர் கலந்து கொண்டு பேசினார்கள். மூத்த சில பத்திரிகையாளர்களும் நடிகர் சிவகுமார் பற்றி பேசினார்கள். அதனை தொடர்ந்து பேசிய சிவகுமார்,

"சினிமா என் அம்மா. அவள் என்னை கைவிடமாட்டாள் என்பது என் நம்பிக்கை! அதனால் நான் யாரிடமும் சம்பளத்தை ஏத்தி கேட்டதில்லை. என்னுடைய 150-வது படத்தில் தான் நான் ஒரு லட்சம் ரூபாய் சம்பளமே வாங்கினேன். ஒரு நடிகனுக்கு முகம் நன்றாக இருக்கும் போதே நடிப்பை நிறுத்திவிட வேண்டும் என்பதால் நடிப்பை நிறுத்திவிட்டேன். நான் பெரிய நடிகன் என்று எப்போதுமே சொல்லிக் கொண்டதில்லை. வாழ்க்கையில் நிறைய கஷ்டப்பட்டு தான் இந்நிலைக்கு வந்திருக்கிறேன். என்னுடைய 14 வயது முதல் 24 வயதிற்குள் வாழ்க்கையின் முழுவதும் வரைந்திருக்க வேண்டிய ஓவியங்களை வரைந்து முடித்துவிட்டேன். இதனை நான் கர்வத்துடனும், பெருமையுடனும் சொல்லிக் கொள்வேன்.

எனக்கு தொடர்ந்து ஆதரவு அளித்து வந்த பத்திரிகையாளர்கள், எனது மகன்களுக்கு ஆதரவு அளித்து வருகிறார்கள். சூர்யாவின் காதல் திருமணம் பற்றியும் எழுதினார்கள். அது நடந்தது, அவர்கள் குடும்பத்துடன் சந்தோஷமாக வாழ்ந்து வருகிறார்கள். எனக்கு அது போதும். இப்போதெல்லாம் பெற்றோர் பார்த்து நடத்தி வைக்கும் திருமணம் மாறிவிட்டது. பெரும்பாலும் காதல் திருமணங்கள் தான்! அப்படி செய்யும் பெரும்பாலான திருமணங்கள் அடுத்த நாள் காலையிலேயே பிரிந்தும் விடுகிறார்கள். காலப்போக்கில் அரேஞ்சுடு மேரேஜ் என்பதே இருக்காது. இனிமேல் காதல் திருமணங்கள் தான் ஜெயிக்கும். ஆண் , பெண் இருவரும் ஒரே இடத்தில் பணிபுரியும் போது பழகுகிறார்கள். அப்படி காதல் திருமணம் செய்து கொண்டவர்கள், சந்தோஷமாக வாழ்ந்து காட்ட வேண்டும். அப்படிப்பட்டவர்களை நான் கையெடுத்து கும்பிட தயாராக இருக்கிறேன். என் இத்தனை வருட வாழ்க்கையில் நான் வரைந்த ஓவியங்களை மீண்டும் ஒரு முறை திரும்பிப் பார்க்க அனைவருக்கும் நன்றி’’ என்றார்.

நடிகர் சூர்யா பேசும்போது, ‘‘மிகப்பெரிய ஜாம்பவான்கள் வீட்டில் இருக்கும் போது அவர்கள் மதிப்பு தெரியாது என்று சொல்வார்கள். என் அப்பாவை மற்றவர்கள் மதித்துக் கொண்டாடும் போது தான், அவருடைய மதிப்பு எனக்கு தெரிகிறது. என்றைக்குமே அவர் நான் இவ்வளவு சாதித்துவிட்டேன் என்று தன்னுடைய எண்ணங்களை எங்கள் மீது திணித்தது கிடையாது. அவர் அன்றாடம் நடந்து காட்டுகின்ற விதம் தான் எங்களை வழிநடத்தி வருகிறது. அப்பா வரைந்த ஓவியங்களை பார்க்கும் போது, கஷ்டப்பட்டு ஓவியக் கல்லூரியில் படித்த அந்த ஏழை மாணவனின் வெறித்தனம் தான் தெரிகிறது. அப்பா எப்போதுமே, எந்த விஷயத்தையுமே எளிதாக எடுத்துக் கொண்டதில்லை. அந்த காலத்தில் கிராமத்திலிருந்து சென்னைக்கு வந்து சாதித்தார். ஒரு ஓவியராக, நடிகராக, சொற்பொழிவாளராக, குடும்பத் தலைவராக சாதித்து காட்டியிருக்கிறார். எப்போதுமே அவர் பணத்துக்கும், புகழுக்கும் அடிமையானதே இல்லை. சினிமாவில் நன்றாக இருந்த காலகட்டத்திலேயே, சினிமாவை தவிர்த்து தொலைக்காட்சி தொடர்களில் நடிக்க ஆரம்பித்தார். இந்த மனநிலை வேறு யாருக்கும் வருமா என்பது சந்தேகம் தான். நாள் தோறும் புதுப்புது விஷயங்கள் கற்றுக் கொண்டே இருக்க வேண்டும் என ஆசைப்படுவார். அந்த விஷயத்தில் அப்பாவை நாங்கள் மிஞ்ச வேண்டும் அல்லது அவருக்கு சமமாக நடக்க வேண்டும் என நானும், கார்த்தியும் போட்டியிட்டு கொண்டு இருக்கிறோம்.
சினிமாவில் இந்த இடத்தை நாங்கள் அடைந்திருந்தாலும், சாதித்துவிட்டதாக நினைக்கவில்லை. அப்பாவைப் பார்த்து பல விஷயங்களில் வியந்திருக்கிறேன். அதில் குறிப்பிடப்பட வேண்டிய விஷயம், அவருக்கு 500 -க்கும் மேற்பட்ட நண்பர்கள் இருக்கிறார்கள். அனைவருடனும் நல்ல நட்பைத் தொடர்ந்து கொண்டிருக்கிறார். அதனைப் பார்த்து பிரமித்திருக்கிறேன். பொறாமையாகவும் இருக்கிறது. மகாபாரதம், ராமாயணம் என்பதைத் தாண்டி இன்னும் பல விஷயங்களை செய்து சாதிக்க வேண்டும் என்று ஆசைப்படுகிறேன்’’ என்ற சூர்யா ’‘அப்பாவின் இந்த பிறந்த நாள் நிகழ்ச்சியில் கலந்துகொண்டு சிறப்பித்த அனைவருக்கும் நன்றி’’ என்று தனது பேச்சை முடித்துக் கொண்டார்!

#Sivakumar #Suriya #Karthi #Jyothika #Singam3 #Kaashmora #PaintingsOfSivaKumarBookLaunch

உங்கள் கருத்துக்களை பதிவு செய்ய...

தொடர்புடைய செய்திகள்

தொடர்புடைய படங்கள்

தொடர்புடைய வீடியோக்கள்

நெஞ்சம் மறப்பதில்லை - டிரைலர் 2


;