36 வயதினிலே - விமர்சனம்

பெண்களுக்கான படம்... அனைவருக்குமான பாடம்!

விமர்சனம் 15-May-2015 1:50 PM IST Top 10 கருத்துக்கள்

Direction : Rosshan Andrrews
Production : 2D Entertainment
Starring : Jyothika, Rahman, Abhirami
Music : Santhosh Narayanan
Cinematography : R. Diwakaran
Editing : Mahesh Narayanan

கிட்டத்தட்ட 8 வருடங்கள் கழித்து, ஜோதிகாவின் அழகான எக்ஸ்பிரஷன்ஸை மீண்டும் வெண்திரையில் பார்க்கும் வாய்ப்பு ரசிகர்களுக்குக் கிடைத்திருக்கிறது. இந்த 36 வயதினிலும் சாதித்திருக்கிறாரா ஜோதிகா?

கதைக்களம்

கல்லூரிப் பெண்ணாக சுதந்திரமாகவும், தைரியமாகவும் சுற்றித் திரிந்த வசந்தி (ஜோதிகா), திருமணத்திற்குப் பிறகு கணவன், மகள், மாமனார், மாமியார் ஆகியோருக்காக முழுநேர குடும்பத்தலைவியாக மாறிப்போகிறார். இப்படியே 13 வருட வாழ்க்கையை கழிக்கும் வசந்தியை ஒரு கட்டத்தில் கணவனும், மகளும் மட்டம் தட்டுவதுபோல் நடந்து கொள்கிறார்கள். இத்தனை வருடம் தான் வாழ்ந்த வாழ்க்கைக்கு அர்த்தமில்லாமல் போனதே என நினைத்து சோகத்திலிருக்கும் நேரத்தில், தன் கல்லூரித் தோழி அபிராமியை சந்திக்கிறாள் வசந்தி. பழைய வசந்தியை அபிராமி மீண்டும் மீட்டெடுக்க, அதன் பிறகு வசந்தி ஒரு ஆச்சரிய முடிவெடுக்கிறாள். அது என்ன முடிவு? அதனால் நடந்தவை என்ன என்பதே இந்த ‘36 வயதினிலே’.

படம் பற்றிய அலசல்

தன் மனைவி என்பதையும் தாண்டி, ஜோதிகாவின் நடிப்பாற்றல் மீதிருக்கும் அதீத காதலே, ஒரு தயாரிப்பாளராக சூர்யா, இந்தக் கதையை ஜோதிகாவுக்காக தேர்ந்தெடுத்திருக்க வேண்டும். அதற்காகவே ஸபெஷல் சல்யூட் சூர்யா! டெக்னாலஜி எவ்வளவுதான் வளர்ந்தாலும் ஒரு பெண்ணின் கனவு, ஆசை என்பது திருமணத்திற்கு முந்தைய காலகட்டத்தோடு சரி, திருமணத்திற்குப் பிறகு அவள் தன் புகுந்த வீட்டிற்காக மட்டுமே வாழ்கிறாள் என்ற நிதர்சனத்தை ஆணித்தரமாக சுட்டிக்காட்டியிருக்கிறது இப்படம். அதோடு பெண் நினைத்தால் அவளால் எந்த வயதிலும் எதையும் சாதிக்க முடியும் என்பதையும் வசந்தி கேரக்டர் மூலம் நிரூபித்திருக்கிறது.

இப்படிப்பட்ட ஒரு அழுத்தம் திருத்தமான சமூகக் கருத்தோடு, நாம் அன்றாடம் உட்கொள்ளும் உணவோடு எவ்வளவு விஷம் நமக்கே தெரியாமல் நம் உடம்புக்குள் போகிறது என்பதையும் விவரித்து ‘பகீர்’ ஆக்கியிருக்கிறார் இயக்குனர் ரோஷன் ஆன்ட்ரூஸ். நாம் குடியிருக்கும் வீட்டின் மொட்டை மாடியிலேயே நமக்கான காய்கறிகளை நாமே பயிர்செய்ய வேண்டியதன் அவசியத்தையும் இப்படம் விளக்குகிறது. கொஞ்சம் அசந்தாலும் டாகுமென்ட்ரிபோல் ஆகிவிடும் ஒரு கதையில் சின்ன சின்ன சுவாரஸ்யங்களைப் புகுத்தி ரசிக்க வைத்திருக்கிறது இந்த ‘36 வயதினிலே’.

படம் கொஞ்சம் மெதுவாக பயணிப்பது போன்ற உணர்வைத் தருவதையும், ஒரு சில காட்சிகள் கொஞ்சம் செயற்கையாக புகுத்தப்பட்டுள்ளதையும் தவிர்த்தால் பெரிய குறையொன்றுமில்லை இப்படத்தில். அளவான பாடல்கள், ரசனையான பின்னணி இசை, தரமான ஒளிப்பதிவு என டெக்னிக்கலாகவும் கவனம் பெறுகிறது இப்படம்.

நடிகர்களின் பங்களிப்பு

இப்படத்தின் வசந்தி கேரக்டரில் நடிக்க, தமிழ் சினிமாவில் ஜோதிகாவைத் தவிர்த்து வேறு யாரையுமே கற்பனை செய்து பார்க்க முடியாது. அப்படிப்பட்ட ஒரு கேரக்டரை தன் அற்புதமான நடிப்பின் மூலம் சாதாரணமாக செய்து அசத்தியிருக்கிறார் ஜோதிகா. ஆங்காங்கே கிடைத்த சின்ன சின்ன இடங்களில் தனது வழக்கமான ‘எக்ஸ்பிரஷன்ஸ்’ மூலம் மீண்டும் பழைய ஜோதிகாவை கண்முன் நிறுத்தியிருக்கிறார். அதிலும் இடைவேளைக்கு முன்பு தன் மகளிடம் ஜோதிகா பேசும் காட்சியில் புல்லரிக்க வைத்திருக்கிறார். வெல்கம் பேக் ஜோதிகா!

ஜோதிகாவைத் தவிர்த்து இப்படத்தில் அதிகம் கவர்வது அவரின் மகளாக நடித்திருக்கும் அம்ரிதா. ஒரு சில காட்சிகளில் மட்டுமே வந்துபோனாலும் ‘நச்’ ரகம்! இவர்களைத் தவிர்த்து ஜோதிகாவின் கணவராக ரகுமான், மாமனாராக டெல்லி கணேஷ், தோழியாக அபிராமி, உடன் வேலை செய்யும் பெண்ணாக தேவதர்ஷினி என அந்தந்த கேரக்டரில் அனைவருமே நன்றாக நடித்திருக்கிறார்கள்.

பலம்

1. முழு படத்தையும் தன் தோளில் சுமந்திருக்கும் ஜோதிகா
2. இப்படத்தின் மூலம் சொல்லியிருக்கும் ஆழமான கருத்துக்கள்
3. ‘எமோஷனல்’ டச்சோடு பயணிக்கும் படத்தின் முதல் பாதி

பலவீனம்

1. கொஞ்சம் ஸ்லோவாக பயணிப்பதைப் போன்ற உணர்வைத் தருவது
2. செயற்கையாக திணிக்கப்பட்ட ஒரு சில காட்சிகள்

மொத்தத்தில்...

‘குடும்பத்துடன் பார்க்க வேண்டிய படம்’ என்ற அடைமொழியோடு பல தமிழ்ப் படங்கள் வெளிவந்தாலும், உண்மையில் இதுபோன்ற படங்களே அதற்கு முழுத்தகுதியானவை. ‘36 வயதினிலே’ படத்தை கண்டிப்பாக அனைவரும் பார்க்க வேண்டியது அவசியம் மட்டுமல்ல அவசரமும் கூட!

ஒரு வரி பஞ்ச் : பெண்களுக்கான படம்... அனைவருக்குமான பாடம்!

ரேட்டிங் : 5/10

உங்கள் கருத்துக்களை பதிவு செய்ய...

தொடர்புடைய செய்திகள்

தொடர்புடைய படங்கள்

தொடர்புடைய வீடியோக்கள்

நெஞ்சம் மறப்பதில்லை - டிரைலர் 2


;