உத்தம வில்லன் - விமர்சனம்

சமரசமில்லாத கலைப்படைப்பு!

விமர்சனம் 4-May-2015 3:43 PM IST Top 10 கருத்துக்கள்

Direction : Ramesh Aravind
Production : Thirrupathi Brothers
Starring : Kamal Haasan, Jayaram, Urvashi, Andrea Jeremiah, Pooja Kumar, Parvathy
Music : M. Ghibran
Cinematography : Shamdat
Editing : Vijay Shankar

பெரும் எதிர்பார்ப்பில் உருவாகி ஒரு சில பிரச்சனைகளையும் தாண்டி வெளியாகியிருக்கும் கமல்ஹாசனின் ‘உத்தம வில்லன்’ அந்த எதிர்பார்ப்பை பூர்த்தி செய்துள்ளதா?

கதைக்களம்

பிரபல நடிகர் மனோரஞ்சனுக்கு (கமல்ஹாசன்) மூளையில் கட்டி ஏற்படுவதால் மரணத்தின் விளிம்பில் நிற்கிறார். அதனால், தான் இறப்பதற்கு முன் ரசிகர்கள் எல்லோரும் சிரிக்கும்படி ஒரு காமெடி படத்தை தந்து விட வேண்டும் என்று ஆசைப்படுகிறார். அதற்காக தனது குருநாதரான மார்கதர்சியிடம் (கே.பாலச்சந்தர்) ஒரு படத்தை இயக்கித் தருமாறு கேட்டுக்கொள்கிறார். இது கமல்ஹாசனை பெரிய ஹீரோவாக்கிய பூர்ணசந்திர ராவுக்கும் (கே.விஸ்வநாத்) அவரது மகளும், கமல்ஹாசனின் மனைவியுமான வரலட்சுமிக்கும் (ஊர்சவசி) பிடிக்கவில்லை. இதனால் அவர்கள் கமலை விட்டுப் பிரிந்து செல்கின்றனர்! முதலில் படத்தை இயக்கி தர மறுக்கும் பாலசந்தர், தனது சிஷ்யன் மரணத்தை நெருங்கி கொண்டிருப்பதை அறிந்து படத்தை இயக்க சம்மதிக்கிறார். அந்த படத்திற்கு ‘உத்தம வில்லன்’ என்று பெயர் சூட்டப்படுகிறது. ‘உத்தம வில்லன்’ படம் எடுக்கப்பட்டதா? கமலின் கடைசி ஆசை நிறைவேறியதா? பிரிந்த குடும்பம் ஒன்று சேர்ந்ததா? இல்லையா? என்பதே இப்படத்தின் கதைக்களம்.

படம் பற்றிய அலசல்

கோடிக்கணக்கான ரசிகர்களை கொண்ட ஒரு பெரிய நடிகரின் வாழ்க்கையில் நடக்கும் சந்தோஷம், கோபம், சோகம், அன்பு, இழப்பு ஆகியவற்றை திரைக்கதையாக்கியிருக்கிறார் கமல்ஹாசன்! அதை ரமேஷ் அரவிந்த் திறம்பட இயக்கியிருக்கிறார். அதில் மனோரஞ்சன் என்ற நடிகருக்கும், அவர் கூட நடித்த யாமினி என்ற நடிகைக்குமான காதல், யாமினி கர்ப்பம் தரிப்பது, மனோரஞ்சனை பெரிய ஹீரோவாக்கிய பூர்ணசந்திர ராவ் அந்த காதலுக்கு வில்லனாக செயல்பட்டு தன் மகள் வரலட்சுமியை மனோரஞ்சனுக்கு திருமணம் செய்து வைப்பது என செல்கிறது படத்தின் முன் கதை! நிகழ்கால கதையில் யாமினிக்கு பிறந்த மகள் மனோன்மணி, ஊர்வசிக்கு பிறந்த மகன் மனோகரன், டாக்டர் ஆன்ட்ரியாவுடனான திரைமறைவு காதல், யாருக்கும் தெரியப்படுத்தாத மனோரஞ்சனின் மூளை கட்டி நோய், மனோரஞ்சனுக்கு அந்த நோய் இருப்பது அனைவருக்கும் தெரிய வரும்போது ஏற்படும் பரபரப்பு, எதிர்பாராத கிளைமேக்ஸ் என திரைக்கதை பயணிக்கிறது! ஆனாலும், ரசிகர்கள் எதிர்பார்க்கும் விறுவிறுப்பும், வேகமும் படத்தில் கொஞ்சம் குறைவே!

தமிழகத்தின் வில்லுப் பாட்டையும், கேரளத்தின் தெய்ய கலையையும் இணைத்து எடுக்கப்படும் ‘உத்தமவில்லன்’ படம் சம்பந்தமான காட்சிகள் ரொம்பவும் நீளம். இருந்தாலும் கமல்ஹாசனின் உச்சகட்ட நடிப்புக்காகவே உத்தம வில்லனை பார்க்கலாம்! படத்தின் கதையோட்டத்திற்கு ஜிப்ரானின் பின்னணி இசையும், ஷம்தத்தின் ஒளிப்பதிவும் பெரிய பலம் சேர்த்துள்ள அம்சங்கள்!

நடிகர்களின் பங்களிப்பு!

மனோரஞ்சன் என்ற நடிகராக கமல்ஹாசன் வாழ்ந்திருக்கிறார். யாமினிக்கு பிறந்த மகள் பார்வதி மேனனை முதன் முதலாக பார்க்கும் போதாகட்டும், மகனுடன் பந்து விளையாடிக் கொண்டே தனது மரணத்தை அவனுக்கு தெரியப்படுத்தும் போதாகட்டும் படம் பார்ப்பவர்களை கண்கலங்க வைக்கிறார் கமல்ஹாசன்! மனோரஞசனுடன் நடிக்கும் நடிகையாக வரும் பூஜா குமார், ஸ்வீட் ராஸ்கல் என்று திட்டிக்கொண்டே கமலிடத்தில் அன்பு காட்டும் இயக்குனர் கே.பாலசந்தர், பூர்ணசந்திரராவாக வரும் கே.விஸ்வநாத், கமலின் மனைவியாக வரும் ஊர்வசி, யாமினியின் கணவராக வரும் ஜெயராம், கமலின் மேனேஜராக வரும் எம்.எஸ்.பாஸ்கர், டாக்டராக வரும் ஆன்ட்ரியா, கமலின் மகளாக வரும் பார்வதி மேனன், ராஜா வேடத்தில் வரும் நாசர் என படத்தில் நடித்துள்ள அத்தனை பேரும் அந்தந்த பாத்திரங்களாக வாழ்ந்துள்ளனர்.

பலம்

1. கமல் ஹாசன்
2. முதல் பாதி திரைக்கதையும், கேரக்டருடன் ஒன்றிய அனைவரின் சிறந்த நடிப்பும்!
3. பின்னணி இசை, ஒளிப்பதிவு, செட், மேக்அப்
4. பாடல் காட்சிகள்

பலவீனம்

1. கொஞ்சம் குழப்பமான இரண்டாம்பாதி திரைக்கதை
2. எடுபடாத சிற்சில காமெடிகள்

மொத்தத்தில்...

இதுபோன்ற படங்களை கமல்ஹாசனால் மட்டுமே தைரியமாக எடுக்க முடியும். வியாபார நோக்கத்தையும் தாண்டி நல்ல சினிமாவை கொடுக்க வேண்டும் என்ற முனைப்போடு திருப்பதி பிரதர்ஸ் நிறுவனமும் அதற்கு கைகொடுத்துள்ளது பாராட்டப்பட வேண்டிய விஷயம். ஜனரஞ்சக ரசிகர்களுக்கு இப்படம் முழுத்திருப்தியைக் கொடுக்காவிட்டாலும் உலகநாயகன் ரசிகர்களுக்கு இப்படம் ஓர் உன்னத கலை படைப்பாகவே இருக்கும்!

ஒரு வரி பஞ்ச் : சமரசமில்லாத கலைப்படைப்பு!

ரேட்டிங் : 5/10

உங்கள் கருத்துக்களை பதிவு செய்ய...

தொடர்புடைய செய்திகள்

தொடர்புடைய படங்கள்

தொடர்புடைய வீடியோக்கள்

சபாஷ் நாயுடு மோஷன் போஸ்டர்


;